|
NOAL Girando par Noal, forse se capisse parcossa no ghe sia chi no ghe piasa caminar sora le so pière lisse, i masegni e i marmi che se basa! Co i porteghi che par come fradeli senpre diversi ma che se someja, qualche volta uguali come zemeli, a inbrassar chi ciacola e chi pasegia par infilarse so antiche contrade. Da alti palassi so le strete cale, colombi varda da gorne sbecade morosi basarse so porte serae. A l’onbra de i tigli, drio le fosse, sensa afano, oncora far quatro passi scoltando la musica de foje smosse da piè che scrica so ‘n tròzo de sassi. Masorini e cigni so l’aqua, zoga dove che tuta la Roca se specia: sto incanto par che i oci te toga imagai quasi da la storia vecia. Da ogni canton te domina ‘na tore, tute soto al Mastio che le sovrasta. Fora da l’aqua che quasi no score e pian sospira: riposate e basta. Vardar sognando bei muri dipinti che l’aqua spiovente in vita riporta rinovando antichi colori stinti testimoni de ‘na storia mai morta. Spiar soto a i porteghi le vetrine, fermarse a un bacaro o al cafè a gustar un onbra o do pastine sentà a on tavolin opur in piè. No xè vita da cità questa de Noale, qua solo se respira on fià de pase, el vivar par on fià pì naturale. Forse par questo ‘l paese piase! Dino Libralato 21-03-2018 |